| Si "Dillinger"
| Alipato |
 |
| Alexander
Martin Remollino |
MATAGAL-TAGAL
NA--halos limang taon na-mula nang itampok sa Magandang Gabi, Bayan
ng ngayo'y Senador Noli de Castro ang tungkol kay Pacifico Guevarra.
Ngunit ngayon ma'y makabuluhan ang kasaysayang ito, at kung iisipi'y
makikitang lalo pang makatuturan ito sa ngayon.
Isinilang sa
Pampanga, si Pacifico Guevarra ay walang pinangarap sa buo niyang
buhay kundi ang maging isang abugado.
Bata pa si Pacifico
ay litaw na ang kanyang katalinuhan. Ayon sa kanyang mga kamag-anak
at kapitbahay, kinaiinggitan siya ng kanyang mga kamag-aral sapagkat
bagama't may mga panahong halos isang linggo siyang hindi pumapasok
sa klase, tuwing kukuha sila ng pagsusulit ay siya at siya rin ang
nakakukuha ng pinakamataas na marka.
Bagama't matalino
nga, sa ibang aspeto ng kanyang buhay-bata ay naging pangkaraniwan
si Pacifico. Dumaan siya, tulad ng karaniwang bata, sa paglalaro
sa lansangan. Marami siyang kaibigan at hindi siya basagulero.
Ganito nang ganito, hanggang sa mamatay ang kanyang ama noong siya'y
nasa haiskul at ang kanyang ina'y mag-asawang muli. Sa kung anong
kadahilanan, ikinasama ng kanyang loob ang pangyayaring ito at siya'y
naglayas.
Hindi naman
siya naging palaboy. Nakakuha siya ng trabaho sa base militar ng
Estados Unidos sa Angeles, kung saan siya'y naging isang masunurin
at matapat na manggagawa.
Isang araw ay
may nawalang makinilya sa base. Si Pacifico ang pinagbintangang
nagnakaw nito. Pilit siyang pinaamin sa pamamagitan ng pambubugbog
at pagpapasak ng siling labuyo sa kanyang bibig. Hindi nakaya ng
mura niyang katawan-wala pa siyang dalawampung taong gulang noon-ang
mga pagpapahirap, kaya't upang matapos ang lahat ay inamin niya
ang salang hindi niya ginawa. Siya'y isinakdal at bagama't kulang
ang katibayan, kaipala'y dahil mga panginoon sa hindi nila lupa
ang mga nagsakdal, nahatulan siyang mabilanggo.
Sa Bilibid,
sa simula'y naging api-apihan siya ng mga matagal nang bilanggo.
Ngunit napatid ang kanyang pagtitiis at siya'y natutong lumaban.
Nasangkot siya sa mga basagulo sa piitan at naging isang gang leader
na pinangilagan ng kanyang mga kasamahan. Nakilala siya sa bansag
na Dillinger, mula sa pangalan ng isang kilabot na gangster sa Estados
Unidos noong unang panahon.
Sa isa sa mga
away sa Bilibid, nakapatay si Dillinger. Nagkaroon siya ng panibagong
kaso at humaba ang kanyang sintensiya.
Patuloy siyang
nasangkot sa mga basagulo sa Bilibid, hanggang sa isang araw, sa
isa ring away, nang sasaksakin na lamang niya ang isa sa kanyang
mga kalaban ay bigla siyang natauhan nang makita ang mukha ng lalaking
tila nagmamakaawa na kung paano.
Umalis siya
sa pinangyayarihan ng kaguluhan. Makaraan ang ilang araw ay nakiusap
siyang ilipat siya sa Medium Security Compound mula sa kinalalagyan
niya noong Maximum Security Compound. Pinagbigyan naman ang kanyang
kahilingan. Doon na niya sinimulan ang unti-unting pagbabagong-buhay.
Nang magkaroon
ng extension program sa Bilibid ang Perpetual Help College (ngayo'y
University of Perpetual Help) sa Las Piñas, isa si Dillinger
sa mga nakapasa sa programa nito. Noon muling natuklasan ni Dillinger
ang kanyang katalinuhan at siya'y nagpakitang-gilas sa pag-aaral.
Ayon sa kanyang mga naging guro roon, napakahusay ni Dillinger sa
pakikipagtalo--madalas na maging ang mga guro'y nahihigitan niya--at
tuwing Araw ng Pagkilala'y may natatanggap siyang medalya.
Inabot ng paglaya
ni Dillinger ang kanyang pag-aaral sa Bilibid, kaya't sa Polytechnic
University of the Philippines siya nagpatuloy. Doon na niya natapos
ang kursong Komersiyo.
Nagtuloy siya
sa abugasya sa Manila Law College. Ayon sa mga naging propesor niya
roon, mahusay ang memorya ni Dillinger at magaling din siyang mangatwiran.
Bagama't hindi siya nagtapos nang may karangalan ay matataas ang
kanyang nakuhang mga marka.
Sa kabila ng
kanyang mga pagsisikap na ibangong muli ang sarili, mukhang naghihintay
sa pagngiyaw ng aso ang katuparan ng kanyang pangarap--ng kanyang
tanging pangarap--na maging isang abugado. Ilang ulit na siyang
humihiling ng pahintulot sa Kataas-taasang Hukuman na kumuha ng
pagsusulit sa bar, subalit ayaw siyang payagan sapagkat siya'y minsang
nahatulang nagkasala ng pagpatay.
Dahil sa kahayupan
ng mga sundalong Amerikano sa Clark Air Base, si Dillinger ay napilitang
umamin sa salang hindi niya ginawa, at dahil dito'y nasadlak siya
sa isang mundo kung saan ang pagiging tao'y halos hindi iginagalang,
at doon, sa pagpupumilit na ipagsanggalang ang sarili, nakapatay
siya. Dahil sa kanyang pagsasanggalang sa sarili ay hindi niya makita--at
mukhang hindi na niya makikita pa--ang katuparan ng tangi niyang
pangarap na maging isang abugado.
Batay sa kasuklam-suklam
na kasaysayan sa Pilipinas ng mga sundalong Amerikano, na tumutulong
umano ngunit wala namang itinutulong, hindi tayo dapat na magtaka
kung sa muli nilang pamamayagpag sa ating lupa'y maulit ang karanasan
ni Pacifico Guevarra--isang buhay na punung-puno ng pangako, subalit
sinira ng isang kaso ng pananampalasan sa Pilipino sa sarili niyang
lupa. Ano kaya ang maaaring naiambag ng isang utak na katulad ni
Pacifico Guevarra sa ating bansa kung hindi sinira ng isang kahayupan
ang kanyang buhay?
Papayag ba tayong
malikha sa ating paligid ang marami pang Pacifico Guevarra?
---------------
Si Alex, 24, Kapatnugot ng Tinig.com, ay isang manunulat sa IBON
Foundation. Sangkot siya sa mga panlipunan at pampulitikang
kampanya, sa lansangan man o sa Internet.
For
comments and reactions to this article, please visit Tinig.com
Forums.
|
