Masyadong Maaga ang Flight

"Tomorrow morning if you wake up, and the sun does not appear..."
- from the song I will Be Here

SINO NGA ba'ng mag-aakala na sa isang iglap ay hindi na pala masisikatan ng araw ang isang nilalang na naging imahen ng bawat kabataang Pilipino? Sino nga ba'ng mag-aakala na sa murang edad ay bigla na lamang siyang babawian ng buhay? Sino nga ba'ng mag-aakala na pagmulat mo, mula sa iyong mahimbing na pagkakatulog ay sasalubungin ka ng balita na patay na si Rico Yan?

At sino nga ba'ng mag-aakala na ngayong nahihimlay na ang kanyang katawan sa lupa ay kaakibat ang mga haka-haka at intrigang mistulang isang bangungot na unti-unting kumikitil hindi lamang sa kanyang alaala kundi pati na rin sa buhay ng kanyang mga mahal?

Masyado bang magulo ang mga isiniwalat ko?!

Minsa'y naisip ko, sana hindi na muna namatay si Rico. Sana'y hindi na muna siya kinuha ng diyos. Ayokong sabihing nagkamali ang Diyos. Pero sa nangyayari ngayon sa buhay ng pamilya ni Rico at kay Claudine, palagay ko masyadong napaaga ang flight, masyadong maaga ang pagdating ng eroplanong papuntang langit.

Kung nabubuhay lamang si Rico ngayon, siguro nabigwasan na niya sa mukha sina Rosanna Roces at Raymart Santiago. Siguro magkakabalikan nga sila ni Claudine. Siguro'y magagawa niyang maipagtanggol hindi lamang ang kanyang pamilya, hindi lamang si Dominic, Claudine, ang ABS-CBN, kundi pati na ang kanyang sarili. Ngunit hanggang pangarap na lamang ito...isang ambisyong kailanma'y hindi na muling mangyayari pa.

Marami pang pupuwedeng mangyari sa mga susunod na araw. Sa ngayon, pinipilit kong tanggapin sa aking sarili na tama ang ginawa ng Diyos. Tama lang ang dating ng flight. Nagkataon lang siguro na wala ni isang dumating upang makapag-paalam man lamang kay Rico.

Magulo man ang aking isinulat, pero iisa lang ang tinutumbok nito, nakarating na si Rico sa kanyang hantungan. Hindi pa man napapanahon ang kanyang paglisan, pero naniniwala na rin ako na kagustuhan na rin ni Rico na dumating kaagad ang flight, para nga naman tuluyan na siyang makapagpahinga.

----------------
Si Ian Gonzales Yap ay nasa ikatlong taon sa kursong Accounting sa De La Salle University-Manila at dating staffmember ng Ang Pahayagang Plaridel.

For comments and reactions to this article, please visit Tinig.com Forums.