MULA SA hindi sinasadyang isang buwang pamamahinga ngayong tag-init, nagbabalik ang Tinig.com. Habang nakabakasyon dahil sa di-maiwasang suliraning teknikal, lalong nagpalakas ang Tinig.com.

Salubungin natin ang mga dati nang kaTinig na pumayag na umako ng mas malaking tungkulin upang mas mapahusay ang Tinig.com.

Ang pinakamasigasig nating contributor, si Alexander Martin Remollino, manunulat sa IBON Foundation, ay siya na nating bagong kapatnugot. Makakatuwang ko siya sa pamahala at editoryal na pagpapasya sa Tinig.com.

Samantala, si Vladimeir B. Gonzales, mag-aaral sa Unibersidad ng Pilipinas at kararating lamang mula sa UP National Writer's Workshop sa Baguio, ay kaagad nating sinalubong ng bagong gawain bilang patnugot sa panitikan.

Kasabay ng mga pagbabagong ito, patuloy pa rin tayong nakikipag-ugnayan sa mga lider ng youth organizations at campus publications upang mas lalong lumakas at marinig ang tinig ng bagong salinlahi.

Sa isyung ito, inaalala natin at pinagpupugayan ang ilang taong sa kani-kaniyang paraan, noong sila'y nabubuhay pa, ay naging bahagi ng buhay nating mga Pilipino.

Si Rico Yan ay hindi lamang aktor na hinangaan ng marami--siya rin ay itinuturing at tinatanggap na role model ng mga kabataan at nakasama nating sa People Power 2. Sa artikulo ni Libay Linsangan Cantor, umaasa siyang "when the shallow fanfare has finally dissipated, the true and serious mourning for Rico will really begin."

Sa mga ng mga Pambansang Alagad ng Sining na sina Lucio San Pedro at Levi Celerio, tayo ay nahimlay at nagising, ayon sa kaTinig nating si Dennis Aguinaldo. Dagdag pa niya, ngayon ay panahon na ng bagong salinlahi para ipagpatuloy ang himig--ngunit bago iyon, karapat-dapat nating pagpugayan muna ang mga Maestro.

Isang human rights advocate at officer ng College Editors Guild si Benjaline Hernandez ngunit maging siya'y nabiktima rin ng paglabag sa karapatang pantao. Sa mga artikulo nina Carlos Conde at Jewel Canuday ng Bulatlat.com at Mindanews at ni Alex Remollino, kilalanin natin si Beng. "You will not be forgotten in our hearts and our minds. You will be the brightest star in the darkness of the night," ayon kay Eric Jude Casilao, kasintahan ni Beng. Nawa'y maging inspirasyon din sa atin ang buhay ni Beng.

Samu't sari pa rin ang ating mga handog ngayong isyu, kasama ang dulang Palaver ng hinahangaan nating si Alberto Florentino; ang maikling kuwento tungkol sa kakaibang pagkakaibigan na sinulat ni Lee Joseph Castel, ang patnugot ng Manila Collegian; at ang panlaban ni Reitch Calabia, isang aktibista para sa kalikasan, sa mga pumupuna sa kanyang timbang.

Maging makabuluhan sana para sa inyo ang Tinig.com v15.

Ederic Peñaflor Eder
Patnugot, Tinig.com

For comments and reactions to this article, please visit Tinig.com Forums.