Salamat at Paumanhin, mga Maestro

ILANG DEKADA ninyong idinuyan ang bayan sa inyong mga tula at musika. Higit kayong kilala sa pagsasaawit sa kadakilaan ng pagmamahal ng isang ina. Binigyang buhay ninyo ang Pilipinong sining Pilipino na ngayo'y unti-unting inilalayo sa amin ng patuloy na alon ng hegemony.

Inaamin naming karamihan sa amin ay hindi kayo lubusang nakilala. Maging ang inyong paglisan ay di namin gaanong napagtuunan ng pansin dahil naging masyado kaming abala sa pag-abang sa balita tungkol sa pagpanaw ng isa naming kasabayan.

Ang masaklap, ang karamihan sa midya'y kinunsinti ang aming apathy. May ilan-ilang nagtangkang ipakilala kami sa inyo bagamat huli na. Samantala, nakontento ang pamahalaan sa pagbibigay lamang sa inyo ng parangal noong narito pa kayo, ngunit walang extra effort upang mas ilapit kaming mga kabataan sa inyo.

Tuloy, mas nasanay kami sa ingay at bilis ng MTV at sa sigaw ng ating mga banda. Hindi gaanong tinangka ng gubyerno na dalhin ang inyong musika sa mga medium na malapit sa amin. Pahapyaw lamang, kung mayroon mang pagtalakay sa inyo sa maing mga paaralan. Samantala, lubhang naging madalang ang paglitaw ninyo sa mainstream media. Kung hindi gayo'y bakit di kami pamilyar sa inyo?

Tanging pasasalamat, pamamaalam at paghingi ng paumanhin na lamang ang aming magagawa ngayon kalakip ang pangakong itititik ang inyong mga pangalan sa magulong musika ng ating kasaysayan, Maetro Lucio San Pedro at Maestro Levi Celerio.

For comments and reactions to this article, please visit Tinig.com Forums.