Paano Kung si Kristo'y Isa sa Atin?
Ni Alexander Martin Remollino

MAHILIG TAYONG magmalaking tayo'y mga Kristiyano. Sa ating mga aklat sa Araling Panlipunan, sinasabing ang ating bansa'y siyang kaisa-isang bansang Asyanong ang kalakha'y Kristiyano. Itinuturing nating mga barbaro, kundi man mga impakto, ang mga Muslim, at ang mga lumad na karamiha'y walang kinagisnang relihiyon kundi ang pananampalataya ng kanilang mga ninuno.

Ngunit talaga kayang mga Kristiyano tayo? Paano kung si Kristo'y naging isa sa atin?

Si Kristo'y hindi nagtapos ng pag-aaral na tulad ng mga Pariseo ng Kanyang panahon. Subalit sa isang pagtatalo'y nahigitan Niya ang mga Pariseo sa isang templo noong Siya'y labindalawang taong gulang lamang. Naging isa Siyang gurong lagalag, at Siya'y nagturo sa pamamagitan ng Kanyang kinathang mga parabulang may mataas na estetikong kahalagahan, at kailangan pa bang sabihing ang parabula'y may malalim na aral?

Ang mga huling taon ng Kanyang buhay ay ginugol Niya sa pagpapalaganap ng isang pananampalatayang nagbabandila ng kalayaan at katarungan at nagtuturong ang lahat ng tao'y "mga kapatid ng isa't isa."

Tayo'y isang lipunang ang turing sa salapi'y siyang puno't dulo ng lahat. Sinasamba natin ang mayayaman nang hindi na inaalaalang usisain kung hindi kaya ang kanilang kayamana'y sa kasuklam-suklam na kaparaanan kinamtan.

Kung si Kristo'y naging isa sa atin, tiyak na ating pagtatawanan ang Kanyang kawalan ng "praktikalidad" na ipinamalas Niya sa pamamagitan ng paggamit ng Kanyang katalinuhan, pagkamalikhain, at husay sa pagsasalita hindi upang magpayaman kundi upang magsulong ng kung anu-anong ideya at simulaing taliwas sa nagisnan nating pananaw sa mundo.

Ang ating bansa'y siyang kaisa-isang bansang Asyanong ang kalakha'y Kristiyano, anang ating mga aklat sa Araling Panlipunan.

-----------------
Si Alexander Martin Remollino, 24, ay isang manunulat sa IBON Foundation. Sangkot siya sa mga panlipunan at pampulitikang kampanya, sa lansangan man o sa Internet.

For comments and reactions to this article, please visit Tinig.com Forums.