|
PANGULONG
TUDLING
Pagtatanggol sa Punong Mahistrado
KATULAD NG iba
pang sangay ng pamahalaan, ang hudikatura ay madalas na nababatikos
ng pabatiran at ng mga mamamayang may malasakit sa bayan. Kadalasang
ibinabato sa sa hudikatura ang mga puna hinggil sa katiwalian o
kahangalan ng maraming hukom, dili kaya'y sa kakapaghalo ng dalawang
katangiang ito sa marami-raming hukom.
Bilang bahagi
ng hudikatura, ang Kataastaasang Hukuman ay di rin ligtas sa ganitong
mga pagtuligsa. Ang Kataastaasang Hukuman naman kasi'y nakagawa
na rin ng marami-raming kapalpakan, kundi man tahasang katarantaduhan.
Ngunit ang mga pagpuna sa Kataastasang Hukuman ay nakatuon dito
bilang isang institusyon, at kung mayroon mang pagpitik sa partikular
na mga mahistrado nito ay bibihira lamang.
Kamakailan,
ang bihira ay naging walang patumangga, ang patak ay naging buhos,
ang ambon ay naging bagyo. At ang binagyo ay dili iba kundi ang
Punong Mahistrado, si Hilario Davide, Jr. Ang bagyo'y nanggaling
sa kamay ng pinatalsik na Pangulong Joseph "Erap" Ejercito
Estrada, na ngayo'y nasasakdal sa salang pandarambong at iba pang
mga kaso.
Si Punong Mahistradong
Davide raw, ayon sa lubhang kapani-paniwalang pantas na si Erap,
ay napaluklok sa kanyang katungkulan dahil sa pagpupumilit ng negosyanteng
si Lucio Tan. Noon pa man daw na nililitis si Erap sa Senado ay
kumiling na sa panig ng tagausig si Davide--bagay na halata raw
sa pananahimik nito nang lumayas ang mga tagausig matapos na mahadlangan
ang pagbubukas ng ikalawang sobre, at nakipagsabwatan daw ito sa
malalaking tao upang upang siya'y pabagsakin.
Sino itong taong
binabato ng ganito katitinding paratang?
Si Hilario Davide,
Jr. ay isinilang sa isang maliit na bahay sa isang nayon sa Cebu.
Nakatapos siya ng abogasya at naging isang abogado sa pamamagitan
ng sariling talino at pagsisikap. Bagama't sandali siyang naging
assemblyman noong panahon ng diktaduryang Marcos, hindi siya nag-asal-buwitring
katulad ng karamihan sa mga opisyal ng naturang rehimen. Ni sa kanyang
mahaba nang panununungkulan sa hudikatura ay hindi siya yumaman
sa pamamagitan ng pagsasalaula sa batas at katarungan. Ang kanyang
kawalan ng anumang bahid ng katiwalian ay makikita sa hindi niya
paggamit ng lubhang mamahaling sasakyan sa kabila ng kanyang pagiging
pinakamataas na ngayong opisyal ng hudikatura.
Sa yugtong ito'y
nararapat na nating itanong kay Erap kung saang imburnal ng kaululan
niya pinulot sa pamamagitan ng kanyang bunganga ang kanyang mga
paratang kay Davide.
Kung ipinaparatang
ni Erap kay Davide ang pagpupumilit ni Tan na ito ang gawing Punong
Mahistrado, hindi ba't si Tan ay nanatili sa pagiging isa sa pinakamasusugid
na tagahimod ng kanyang puwit, at kailan na lamang niya nakaaaway,
nitong matagal-tagal nang nanununungkulan ang humalili sa kanya,
ang butihin at sakdal ng talinong si Gloria Macapagal-Arroyo?
Sa kabila nito'y
tumaliwas si Davide noong Enero 20, 2001 sa kagustuhan ng mga maka-Erap--kung
kanino isa sa mga nangunguna noon si Tan--sa pamamagitan ng kanyang
pagpapapasumpa kay Macapagal bilang pangulo.
At hindi ba't
noong nililitis si Erap sa Senado'y pinagbigyan ni Davide ang magkabilang
panig? Ang magsabing sa gayo'y naging makiling ang Punong Mahistrado
ay siyang pinakamatalinong tao sa kasaysayan ng sangkatauhan.
Tungkol naman
sa pananahimik ni Davide nang lumayas ang lupon ng mga taga-usig
mula sa Senado noong kasumpa-sumpang gabi ng Enero 16, 2001, iyo'y
isang tanda ng kanyang talino at pagpapahalagang labis sa katarungan.
Nabatid niyang ang hangad ng nakararami sa Senado noon ay hadlangan
ang pagbibilad ng katibayang makapagbibigay-daan sa makatarungang
pagpapasya. Natalos niyang dahil dito'y tiyak nang hindi magbubunga
ng katarungan ang paglilitis na yaon at samakatuwid ay nawalan na
ng katuturan. Ano pa nga ang saysay ng siya'y magsalita sa gayong
kalagayan? Alam ni Davide na masasayang lamang ang kanyang laway
at panahon kung siya'y magsasalita pa noon, kaya't pinili niya ang
manahimik na lamang.
Mula rito, ang
isiping si Hilario Davide, Jr. ay isang uri ng taong makikipagsabwatan
sa sinuman upang pabagsakin nang kung paa-paano na lamang ang isang
pinunong may moral at ligal na dahilan upang manatili sa katungkulan
ay isang kabaliwang higit pa sa pinapagsama-samang kabaliwan ng
lahat ng mga pasyente sa National Center for Mental Health.
Ang ginawa ni
Davide sa EDSA noong Enero 20, 2001 ay pagsasapormal lamang ng pagkawala
ng karapatan sa kapangyarihan ng isang pamahalaang walang kahihiyang
dumura sa batas at kumitil sa katarungang nararapat nitong itaguyod.
Ang pagkulapol
ng putik sa dangal ng isang taong tulad ni Hilario Davide, Jr. ay
isang nagdudumilat at nadudurong kalapastanganan. Ang kalapastanganang
ito'y nararapat na dukutan ng mata at putlan ng daliri. (Alexander
Martin Remollino)
For
comments and reactions to this article, please visit Tinig.com
Forums.
|
