|
TULA
Ayaw Ko Nang Manungkit ng mga Tala
Ni Carlos
M. Piocos III
Nung bata ako
Pinilit kong abutin ang mga bituin
Kasi sa 'Gapo
mas marami ang nakakalat na tala
Puwedeng sungkitin
Parang mga patay-sinding ilaw
Ang iba't ibang kulay ay naglalaro,
Umaandap kasabay ang mabagal na tugtog,
May usok at may aromang nagmumula
sa boteng may sariling espiritu
Sa harap ay may gumigiling na
Isang hubad na payaso
...sumusungkit rin ng munting tala
Kasi sa iskul
kailangan marami kang tala
Uuwi ka sa bahay
Dapat may talang nakasabit sa iyong papel
Para mapangiti ko si Inay
Kasi gusto niya ng maraming tala
Mahilig siya sa tala
Gusto niya 'pag uwi ko nakasabit yun sa
Aking papel na may mga bughaw at pulang na guhit
Mahilig rin siya sa corned beef at kay Audrey Hepburn
...Pero mas mahilig siya sa mga bituin
Kasi gusto kong
maabot ang langit
At doon ay kukunin ko ang nakasabit na tala
Gusto kong magliyag sa eroplano
At agawin kay Buwan ang tala
Mas bagay siya sa papel ko
Kaysa sa madilim na kaitaas-taasan
Pero ayaw ng
tatay ko nang tala
Sabi ko punta kami sa langit
'Pagkagaling niya sa "base"
Sabi ko gusto ko nang maraming tala
Pero sabi niya marami nang tala ang tatlo
Sabi ko gusto kong kumain ng fried chicken
Pero sabi niya masama sa akin ang masyadong maalat
Sabi ko gusto kong laruin sa aking mga palad ang puting snow
Pero sabi niya may mga malalamig na nakakapaso
Hindi ko maintindihan kung bakit ayaw niya ng tala
Ang nanay gusto niya ng tala
Pero ang itay ayaw niya
Hindi ko talaga siya maintindihan
Pero ngayon...
... nang mapuno ko na nang tala ang aking papel na may bughaw at
pulang guhit
... nang nakatikim na ako ng fried chicken
... nang napuno na ng 'Gapo, hubad na payaso, at nagkasupling pa
ng mga nawawala at naghahanap
... nang napuno na ang cupperboard ni nanay ng Spam
... nang umuwi na ang tatay mula sa base
...ayaw ko nang
manungkit ng tala
Kasi walang
kulay ang mga talang nakasabit sa bughaw at pulang guhit na papel
Kasi ayaw ko ng mga payaso at ng mga nag-iiyakang supling nila
Kasi ayaw ko ng masyadong maalat, ayaw ko ng nakakapasong lamig,
ayaw ko ang mga pelikula ni Audrey Hepburn
Kasi mas malakas ang tinig ng mga sumisigaw na pulang letra sa plakard
Kaysa sa mga malalaking billboards sa EDSA
Kasi sapat na ang tatlong tala
Kasi mas maganda kung makukuha ko naman ang araw
-------------
Si Carlos M. Piocos III ay kasapi ng UP Ugat.
For
comments and reactions to this article, please visit Tinig.com
Forums.
|
