Liham sa Pangulo Ngayong Araw ng mga Puso
Ni Armando Sinaglahi

Pebrero 14, 2002

Kagalang-galang na Pangulo,

Maligayang Araw ng mga Puso. Batid kong masaya ang inyong pagdiriwang sa kaganapang ito. Tiyak na punung-puno ng palamuti at mga pagkain ang inyong hapag-kainan ngayon, at maraming kaibigan ang bumabati sa inyo at dumadalo sa inyong handaan.

Maligayang Araw ng mga Puso, kahit na kaming mga kababayan mo'y tinitiis ang sakit ng buto't laman upang mapanatiling buhay ang aming mga sarili; kahit na marami sa ami'y walang masilungan lalo na kapag umuulan; kahit na marami sa amin ang nagkukulang ng pagkain sa pang-araw-araw na pamumuhay; kahit marami sa amin ang ipinagbibili ang katawan at kaluluwa matugunan lamang ang pangangailangan ng aming mga kamag-anak, kaibigan, o kung sinumang malapit sa aming puso.

Maligayang Araw ng mga Puso, kahit nangangamba kaming ipinagbibili ninyo ang inyong katawan, kaisipan, at kaluluwa upang matugunan ang kagustuhan ng iilang mga hangal na wala namang nagawa upang mapagbuti ang kalagayan ng lupang ating kinatatayuan ngayon. Ipinagbibili ninyo ang inyong sarili upang makamit ang kaligayahang panandalian lang naman--ang walang kapantay na kapangyarihan.

Maligayang Araw ng mga Puso, kahit na nangangamba kaming ipinagbili mo na ang aming mga kaluluwa sa nakapangingilabot na apoy ng demonyo na siyang tunay na namumuno ngayon sa daigdig na ito.

Ipinagbibili mo kami kay Tiyo Samuel, isang taong ipinagbili na rin ang kanyang kaluluwa sa Demonyo sa pamamagitan ng pangangamkam ng mga yaman ng iba't ibang bansa sa matagal na panahon, sa pamamagitan ng Balikatan, na ayon sa inyo'y isa lamang pagsasanay ng mga kawal na Amerikano't Pilipino, ngunit aming pinangangambahang isang totohanang digmaang mananalanta hindi lamang ng mga itinuturing na kalaban ni Tiyo Samuel kundi maging mga taong walang kinalaman sa labanan, batay na rin sa naitalang pagkakapatay sa 3,500 sibilyan sa Afghanistan.

Maligayang Araw ng mga Puso, kagalang-galang na Pangulo. Batid kong talagang masaya ang inyong pagdiriwang ng kaganapang ito.

Sumasainyo,
Armando Sinaglahi

-----------------
Ayon kay Armando, siya ay ang pinakapinagpalang nilalang pagdating sa
kaanyuan.

For comments and reactions to this article, please visit Tinig.com Forums.