Gloria Macapagal-Arroyo: Dakilang Lider
Ni Julio Dimaano

"Hindi ka Pilipino kung tutol ka sa katahimikan at kaunlarang pangako ng Balikatan 2002," sabi niya.

"Kung hindi ka Pilipino ay sino ka? Isang protector ng mga terorista. Isang kasosyo ng mga mamamatay-tao. Isa kang Abu Sayyaf lover!" dagdag pa ni Macapagal.

"Panahon na para makilala kung sino ang kakampi ng demokrasya at pagtutulungan ng mga malayang bansa at kung sino ang kampi ng terorismo at paghahari ng pwersa ni Osama bin Laden. Dapat makilala kung sino ang nasa panig ng kalayaan at kung sino ang nasa panig ng pananakop. Walang Pwedeng miron lamang. You're either for or against democracy, freedom and prosperity. There can be no bystanders," sabi pa niya

(Basahin dito ang buong pahayag ng Pangulo.)

Sa mga pahayag na iyan, makikitang si Macapagal ay tunay na dakilang lider ng mga Pilipino. Taglay niya ang maraming mga katangian.

Malikhain
Upang isulong ang kanyang kampanya laban sa terorismo, gumagawa siya ng mga orihinal at madamdaming pananalita na hindi pa kailanman narinig ng buong daigdig. Hindi siya gaya ng iba na ginagaya ang style ng mga taga-ibang bansa, gaya ng "If you're not with us, you're with the terrorists."

Matalino
Ipinakikita ng mga pananalita ng BB. Macapagal ang kanyang katalinuhan at kalawakan ng pag-iisip. Bago magpahayag, matama niyang nililimi ang mga kahulugan ng kanyang sinasabi. Sobrang bukas ang kanyang pag-iisip, hindi niya ikinakahon ang mga bagay-bagay at tinitingnan niya ang iba't ibang perspektiba sa isang usapin. Gaya ng ibang matatalinong tao, hindi naniniwala ang Pangulo na black and white lamang ang mga kulay sa mundo. Sobrang taas nga ng IQ ni Bb. Macapagal. Lalong higit ito sa IQ ng pinatalsik na Panggulong Estrada at sa sinipang diktador na si Marcos.

Independiente
May tiwala si Bb. Macapagal sa minamahal niyang sandatahang Lakas. Hindi niya iniaasa ang kaunlaran nito sa ibang mga bansa.

Malakas na sense of history
Kitang-kita na pinag-aralan nang matama ni Bb. Macapagal ang kasaysayan ng kanyang bansa. Hindi pa niya nalilimutan ang magagandang ginawa ng Amerika sa Pilipinas. Naaalala pa niya ang pagtulong nitong makawala ang bayan sa mga mananakop na Espanyol at Hapon. Naaalala pa niya ang kabaitan ng Amerika sa Pilipinas noong Filipino-American War. Hindi niya nalilimutan ang magandang epekto sa lipunan at kapaligiran ng base militar ng Kano. Naalala pa niya ang napakagandang pagturing mga Amerikano sa mga Moro.

Malambing
Masuyo, malambing at hindi masungit na lider si Bb. Macapagal. Hindi niya tiniterorize ang mga tao. Hindi niya isinasaksak sa baga ng mga ito ang kanyang paniniwala. Hindi niya dinidiktahan at tinatakot ang mga Pinoy para sundin ang kanyang policies. Hindi niya patusong ginagapang ang mental at emosyonal na vulnerability ng kanyang mga nasasakupan.

Sa ilalim ng gobyernong Macapagal, tiyak ang Pilipinas ay uunlad, magiging mapayapa, malaya at makakatayo sa sariling paa.

Gaya nina Ferdinand Marcos, ang dakilang diktador, at Joseph Estrada, ang ama ng masa, si Gloria Arroyo, ang cute na presidente, ay itinadhana sa kadakilaan.

-----------------
Si Julio ay aminadong Abu Sayyaf lover at fan ni Osama bin Laden. Siya ay palabiro at minsan ay medyo sarcastic. Webmaster siya ng Erap-Resign.Net na wala na yatang bumibisita ngayon.

For comments and reactions to this article, please visit Tinig.com Forums.