Pebrero 2002

Mahal na Pangulo;

Maligayang bati sa anibersaryo ng dalawang People Power. Alam naming mahalaga para sa iyo ang oksyong ito; at ito'y mahalaga rin para sa amin sapagkat muli na namang nangibabaw ang tunay na may-ari ng kapangyarihan: kaming mga mamamayan.

Sa pagdiriwang natin ng okasyong ito, isang magandang regalo para sa amin ang ipagkait ang lugar na dati nating pinagtipunan at naging bahagi na ng ating kasaysayan.

At hindi pa dyan natatapos ang iyong regalo mahal na pangulo, binalutan mo pa ito ng ibat-ibang klaseng pamumulitika: nandyan ang ipangalandakan mong mas matalino ka at mas mataas ang IQ kaysa sa pinalitan mo. Nandyan din ang gumamit ka ng malaking halga para lamang mapaganda ang imahe mo sa mga bansang nakapaligid sa iyo.

Ngayong araw ng mga puso, maaga ang regalo mo kagalang-galang na Pangulo.

Pinaratangan mo kaming mga tumututol sa Balikatan na "Hindi tunay na
Pilipino, tagahanga ng Abu-Sayyaf at ni Bin-Laden."

Mahal na Pangulo, nais naming liwanagin na kaming mga tinatawag mong "di
tunay na Pilipino" ay maaaring mas higit na Pilipino kaysa sa kaninumang iniisip mo. Naniniwala kaming mas higit na maka-Pilipino ang mga mamamayang marunong gumalang at magpahalaga sa ating kasarinlan at sa tinatamasa nating kalayaan.

Mas higit ding naman yata kaming maka-Pilipino sa hindi naming pagsamba at paghanga sa kakayahan ng mga dayuhan sapagkat naniniwala kami na kaya rin nating tumbasan anumang kakayahang meron sila, pagkat tayo'y pare-parehong mga tao na kaparis nila.

Minamahal at iginagalang naming Pangulo, bilang isang lider, sana'y ipakita
mo sa bawat mamamayang Pilipino na kaya nating lampasan ang mga suliraning ating kinakaharap. Kaya nating tumayo at ipagmalaking tayo ay "Pilipino," namumuhay na nagsasarili, malaya at hindi umaasa sa tulong ng mga dayuhan.

Lubos na gumagalang,

Juanito Delmo

For comments and reactions to this article, please visit Tinig.com Forums.