KOLUM
Paggunita at Pagsasabuhay ng People Power 2
Ni Mong Palatino

SABI NG Peoples’ Consultative Assembly (PCA), maglulunsad ulit sila ng people power kung hindi titino si Pangulong Gloria Macapagal-Arroyo. Sagot naman ng Pangulo: Sino kayo at ilan ba kayo? Dagdag ng isang alyado ni Ate Glo mula sa civil society (uncivil society ayon kay Herman Laurel): Hindi tao ang nagpapatawag ng people power kundi ang Banal na Espiritu. Teka, teka, mukhang may mali dun ha.

Unang anibersari ng People Power 2 kaya’t di nakapagtatakang lumitaw ang iba’t ibang media gimik ng maraming grupong nag-aastang makamasa at tagapanguna ng pag-aalsa ng bayan noong isang taon. Hayaan na natin silang magbuhat ng kanilang mga bangko. Sana madapa sila.

Higit na dapat bantayan ang mga ilalabas na pahayag ni GMA ukol sa mga nagawa niya bilang lider ng bansa. Tiyak na ipagmamalaki niya ang mga prinsipyong naitaguyod ng kanyang administrasyong iniluklok ng malawakang pagkilos ng sambayanan. Lulunurin tayo sa mga datos ng mga proyektong sinimulan at natapos ng pamahalaan sa kanyang pamamalakad. Mga proyektong hindi naramdaman o nagdulot ng kaginhawaan sa karamihan.

Kung tutuusin tama ang PCA sa pagkilala kay GMA bilang isang kabiguan. Walang pagbabagong naganap sa ating bansang matagal nang naghahanap ng glorya. Imbes na gumaan ang buhay ay lalong nagdusa ang mamamayan. Sapat na ang isang taon upang makita ang tunay na kulay ng bagong rehimen. Humulas na nga ang tunay na mukha ni Ate Glo sa likod ng kanyang mga pilit na ngiti sa TV at wala siyang pinagkaiba kay Erap, Ramos o Marcos.

Para sa isang aktibong kalahok ng People Power 2, mahirap tanggapin sa una ang mapait na katotohanang isang malaking kabiguan si GMA. Pero kahit saang anggulo ko suriin ang kanyang pamumuno, wala talaga akong makitang bagay na maaari kong ipagmalaki.

Kung ganito ang sitwasyon, makatwiran pa bang gunitain ang unang taon ng People Power 2?

Ang sagot ko ay hindi lang dapat gunitain ngunit dapat muling isabuhay ang diwa ng pag-aalsang ito. Aksidente lamang si GMA kung kaya't siya ang pangunahing nakinabang sa pagbagsak ni Erap. Naganap ang People Power 2 dahil sa pagnanasa ng mamamayan ng pagbabago at katarungang panlipunan. Hindi salik si GMA kung bakit naging matagumpay ang People Power 2.

Nagwalk-out ang mga estudyante noon sa kanilang mga klase hindi upang suportahan si GMA kundi pabagsakin ang isang pamahalaang inutil at kontra-mamamayan. Natitiyak kong dumagsa ang mga Pilipino sa EDSA hindi upang gawing Pangulo si GMA kundi pangunahin ang pagtutuldok sa paghahari ng masamang Pangulong Estrada.

Sariwain natin ang mahahalagang aral ng People Power 2 dahil dito natin mauunawaan ang kawastuhan ng ating mga pagkilos noon. Pinatunayan muli ng People Power 2 na sa ating pagkakaisa ay nagagawa nating hamunin at baguhin ang ating gobyerno. Sa ating pagkakabuklod naroon ang tagumpay. Hindi ba’t ang aral na ito ay sapat nang dahilan upang gunitain ang People Power 2?

Makiisa tayo sa selebrasyon ng anibersaryo ng People Power 2. Mas mainam kung magdaos tayo ng mga sarili nating pagdiriwang at ipagmayabang ang papel na ginampanan natin o ng ating grupong kinabibilangan sa eskuwelahan, trabaho, pamilya, barkada, simbahan, at opisina sa paghuhubog ng ating kasaysayan. Huwag lang nating kalimutang paalalahanan ang ating mga sarili lalo na ang kaibigan natin sa Malacañang na hindi pa natatapos ang krusadang ating sinimulan noong isang taon para sa isang lipunang may hustisya, demokrasya at kalayaan.

Kung ayaw pa ring makinig ni GMA sa kabila ng ating pagpapaalala, gamitin na natin ang sandatang kaya nating panghawakan kahit anong oras at napatunayan na ang bisa: ang ating pagkakaisa. Alalahanin nating nag-iisa lamang siya sa Palasyo at mangilan-ngilan lamang ang masugid niyang tagapagtanggol samantalang tayo ay milyun-milyon. Salamat sa People Power at napansin natin ito.

-------------
Si Mong Palatino, ang bagong halal na pangulo National Union of Students of the Philippines, ay chair ng UP Diliman Student Council noong sumabog ang People Power 2.

For comments and reactions to this article, please visit Tinig.com Forums.