Tuloy ang Laban
Ni Mao Ocson

NITONG NAKARAANG ika-20 ng Enero, taong kasalukuyan ay muling sinariwa ng sambayanang Pilipino ang isang tagumpay ng bayan sa pagpapatalsik sa dating pangulong Joseph Estrada.

Ang mga kabataan ay kasama sa libu-libong mamamayang nagtungo sa EDSA, sa Mendiola at iba pang lugar sa Pilipinas upang ipakita ang kanilang paghahangad ng pagbabago. Subalit sa kabila ng mga pangyayaring iyon ay nawalan ng saysay ang kanilang pagkilos. Oo nga't nabago ang pamunuan subalit ang pumalit naman ay hindi naglilingkod para sa kagalingan ng sambayanang Pilipino.

Si Pangulong Gloria Macapagal-Arroyo ay walang iniintindi kung hindi ang magpapogi sa militar, simbahan at ilang faction ng naghaharing uri. Hindi man lamang niya naisip na mas malaki ang utang niya sa sambayanang Pilipino. Imbes na pagtuunan ng pansin ang problema sa edukasyon, sahod at iba pang pangserbisyong sosyal ay bising-bisi siya sa paglalakbay sa ibang bansa.

Ang mga obserbasyong ito sa panunungkulan ni GMA ay lubos na nakakapagpababa ng aking pagtingin sa kanya bilang pangulo sa bansa.

Bilang isang kabataang naging bahagi ng dakilang pag-aalsa, ako'y lubos na nalulungkot sa walang katuturang nangyayari sa ating pamahalaan. Subalit hindi dito nagwawakas ang laban ng ng bawat kabataang gaya ko, sapagkat patuloy na magpupunyagi ang bawat kabataan at lalaban sa anumang pang-aabuso sa pamalaan.

Si Mao Ocson ay kasapi ng Anakbayan at kasama sa staff ng Center for Media Freedom and Responsibility.

For comments and reactions to this article, please visit Tinig.com Forums.