By Lolito Go on May 22, 2008
Natigmak ng dugo mo, Ka Bel,
ang buong lupaing inararo’t kinandili
ng iyong pag-ibig. Nahinto ang nguya
ng makina sa bukid. Napatid ang indak
ng maso at karit. Maging sa huling sandali,
bayani kang nagsilbi. Ilang bubong na ba
ang iyong nakumpuni? Ilang bagyo na ba
ang iyong sinalubong, maisilong lang kaming
giniginaw at gutom? Ilang ulit ka na ba nilang
tinalian, sa bawat mong pagtatangkang
kami’y kalagan? Sa palasyo ng mga lakan,
walang sirang bubungan. Bagaman
abala ang lahat na takpan ang mga siwang
na tinatagasan ng mga katotohanan.
Hindi tulad mo, kaya nilang umupa
ng mga karpintero, mekaniko’t arkitektong
milagroso. Masdan mo at misteryosong naglaho
ang mga tagas, bakbak at lubak sa palasyo.
Subalit ikaw, hanggang sa huling yugto
ng payak mong pamumuhay sa mundong
ang kapayaka’y tila pa kapintasan,
hawak mo ang kaibigang martilyo at pakong
hindi ginto. Walang gintong isasabay sa iyong kabaong.
Anakpawis kang magbabaon ng aming panaghoy.
Posted in Tula | Tagged Anakpawis, Crispin Beltran, Ka Bel
Si Lolito Go Jr, 23, ay kilala rin sa bansag na "Bum". Madalas ay makikita siyang suot ang kanyang all-black anti-fashion statement. Naniniwala si Bum na ang tunay na paaralan ay ang lansangan. Dahil dito, wala siyang balak na bumalik sa kolehiyo. Mahilig si Bum sa pelikula; ito ang kanyang inaaral. Partikular siyang naaaliw sa mga likha nina Woody Allen, Hitchcock at Kurosawa. Praning din siya sa musika ni Paganini at panitik ni Ginsberg.
Limang taon siyang nanilbihan bilang SK Chairman sa Olongapo hanggang taong 2007. Natalo siya bilang konsehal matapos tumangging paputulan ang kanyang buhok na hanggang hita. Dinaig siya ng mga kilalang lasenggo at manunugal sa barangay.
Tiwala si Bum na ang panulat ay mabisang sandata ng kabataan laban sa pulitikal na opresyon at karukhaang ispiritwal. Sa ngayon, abala siya sa pakikipaghabulan sa pag-ibig, pagsusulat at pakikibaka. Nailathala na rin ang kanyang mga katha sa Bulatlat, Dalityapi, Sunday Inquirer Magazine, Emanilapoetry at iba pang online at print publications.
Sa kasalukuyan, si Bum ay abala sa pagiging ahente sa isang call center sa Clark, Pampanga.
