By Noel Sales Barcelona on August 9, 2007
(Pasintabi kay G. Pascual)
Eh ano ngayon, G. Pascual
Kung gaya rin ng tibok
Ng nilalang na nagluwal sa ‘yo
Ang tibok ng puso mo?
Dapat bang ikahiyang
Bukod sa pusong ama,
Ramdam mo rin ang
Pagiging isang ina?
Eh ano ngayon, G. Pascual,
Kung sa bawat pagpikit mo
Lalaking walang saplot
Ang siyang nagduduyan sa iyo
At katulad mo ring Adan
Ang pinapangarap mong
Sa iyo ay magmahal?
Natatakot ka rin ba
Sa anino ng Sodoma at Gomora,
Ng mga haliging asin,
Ng mga granizong mula sa kalangitang
Susupok sa iyong kaluluwang
Sa tingin nila ay makasalanan?
Eh ano ngayon, G. Pascual
Kung sa bawat gabi
Kaniig mo ang kapwa mo
May tunod, katulad mo ang
Anyo tuwing walang saplot?
Na ang nagpapainit,
Pumapaso sa dugo ay tulad mo ring
Kapag tinawag ng kalikasa’y
Hindi makaupo? Hindi maipit
Nang husto ang dalawang hita.
Eh ano ngayon, G. Pascual?
Eh ano ngayon, kung ikaw
Ay si Adang may pusong Eva?
Eh ano ngayon kung ipinanganak kang
May hibo ng pagnanasa
Sa may kapangyarihan ding
Baliwin ang mga anak ni Eva?
Huwag mong ikahiya,
Kung totoo man
Ang katauhang kinandili rin naman
Nang ganoong katagal
Sa anino ng malalamig na gabi
Sa tuwing nagtatago ang
Buwan sa likod ng mga ulap
At ang bituin, halos sumilip
Lamang sa tabing ng mga alapaap
Sapagkat ang puso’t kaluluwa’y
Napalalaya ng katotohanan…
(Walang halong panunukso…
Kung tunay man, G. Pascual…
Kung tunay man, G. Pascual
Sana’y aminin sa sarili.
Subalit sabi nga nila–
Walang ibang nakakikilala
Sa sariling anino
Kundi ang may-ari…)
Posted in Tula | Tagged Piolo Pascual
Dating patnugot ng pahinang pang-overseas Filipino worker (OFW) at internasyonal ng Pinoy Weekly (http://www.pinoyweekly.org) si Noel Sales Barcelona.
Naging public information officer din siya ng pambansang sentro ng mga kawani ng gobyerno, ang Confederation for Unity, Recognition and Advancement of Government Employees o Courage (http://www.courage-phil.org/).
Premyadong makata at kwentista, ginawaran siya Kagawaran ng Filipinolohiya ng Politeknikong Unibersidad ng Pilipinas (PUP) ng pagkilala bilang "Makatang Mag-aaral ng Taon" noong 2002 na siya pa rin, magpahanggang ngayon, ang may hawak.
Noong taon ding iyon, nakamit niya ang Ikalawang Gantimpala sa Patimpalak Panulaan ng Pandayan ng mga Literaturang Pilipino, Inc. (Pandaylipi, Ink.), sa okasyon ng ika-25 anibesaryo nito.
Naging isa siya sa mga pinalad na maging finalist din siya sa Kabuwanan Poetry Competition nitong Abril, 2008; at noong Hulyo 29, binasa sa buong mundo, sa pamamagitan ng Internet, ang kanyang kuwentong nalathala rito sa Tinig.com, ang Bote, Dyaryo, Bakal at ginawaran siya ng Certificate of Literary Achievement ng mga Pilipino-Australiyano sa Brisbane, Au.
Isa ring propesyunal na tagapaturo ng pamahayagan (journalism) at panitikan, naging panauhin siyang tagapagsalita sa iba't ibang paaralan at kolehiyo rito sa Maynila at sa karatig lalawigan ng Rizal.
Bukod sa Pinoy Weekly, nagsusulat din siya sa investigative news magazine na Bulatlat.com, PINAS (The Filipino's Global Newspaper) na may sirkulasyon sa 19 na bansa sa Asya, Europa at America Norte, at naging kolumnista sa ngayon ay sarado nang Punto!, isang tabloid sa Filipino.
wahhhh, piolo bayot…^_^
[...] Eh Ano Ngayon Kung Bakla Ka, Piolo? [...]