By Lolito Go on 1/4/2010
Unang nahukay ang mga yuping sasakyan
Saka(y) ang mga katawang may yuping mga mukha
Limampu’t pitong bangkay ang opisyal na bilang.
Sapat na dahilan upang magluksa ang bayan.
Sunod nilang nahukay ang mga armas,
Matataas na kalibre ng mga sandatang pang-aklas
Dalawang batalyong rebelde ang opisyal na bilang.
Sapat na upang ilunsad ang batas-militar
Huling nahukay ang kahun-kahong mga balota
At iba pang parapernalyang panghalalan.
Binilanggo’t inilibing na mga bilang. Hindi mabilang
Ang dahilan kung bakit ako nahihibang.
Posted in Tula | Tagged Ampatuan Massacre |
Si Lolito Go Jr, 23, ay kilala rin sa bansag na “Bum”. Madalas ay makikita siyang suot ang kanyang all-black anti-fashion statement. Naniniwala si Bum na ang tunay na paaralan ay ang lansangan. Dahil dito, wala siyang balak na bumalik sa kolehiyo. Mahilig si Bum sa pelikula; ito ang kanyang inaaral. Partikular siyang naaaliw sa mga likha nina Woody Allen, Hitchcock at Kurosawa. Praning din siya sa musika ni Paganini at panitik ni Ginsberg.
Limang taon siyang nanilbihan bilang SK Chairman sa Olongapo hanggang taong 2007. Natalo siya bilang konsehal matapos tumangging paputulan ang kanyang buhok na hanggang hita. Dinaig siya ng mga kilalang lasenggo at manunugal sa barangay.
Tiwala si Bum na ang panulat ay mabisang sandata ng kabataan laban sa pulitikal na opresyon at karukhaang ispiritwal. Sa ngayon, abala siya sa pakikipaghabulan sa pag-ibig, pagsusulat at pakikibaka. Nailathala na rin ang kanyang mga katha sa Bulatlat, Dalityapi, Sunday Inquirer Magazine, Emanilapoetry at iba pang online at print publications.
Sa kasalukuyan, si Bum ay abala sa pagiging ahente sa isang call center sa Clark, Pampanga.
