Bagama’t malaya bilanggo ang isip
Sa bangis ng takot na mula sa hukay;
Ang hapong katawan ngayo’y ginigipit.
O’ kasalanan ba maging taga-akay?
Ng tunay na batas pilit pinapatay;
Bagama’t malaya bilanggo ang isip.
Sa minsang pagsigaw, paghingi ng gabay
Ang naging kapalit hapdi n’yaring latay;
Ang hapong katawan ngayo’y ginigipit.
Mata’y piniringan ng pighati’t lumbay
Bibig binusalan tinungkab ang tibay;
Bagama’t malaya bilanggo ang isip.
Tinanikalaan ang paang pangsuhay
Ginapos ng luha itong mga kamay;
Ang hapong katawan ngayo’y ginigipit.
Pano pa aalpas hustisyang mahalay?
Kung ang nakaamba ay banta ng lamay.
Bagama’t malaya bilanggo ang isip,
Ang hapong katawan ngayo’y ginigipit.
